Ўзбекистон раҳбари Туркия президентини қайта сайлангани билан қутлади

Тошкент. 25 июн. ЎзТАГ – 24 июн куни Ўзбекистон Республикаси Президенти Шавкат Мирзиёевнинг Туркия Республикаси Президенти Режеп Таййип Эрдоған билан телефон орқали мулоқоти бўлиб ўтди, деб хабар беради Ўзбек телеграф агентлиги (ЎзТАГ).

Бу ҳақида Ўзбекистон Президентининг матбуот хизмати маълумот берди.

Суҳбат бошида Шавкат Мирзиёев Режеп Таййип Эрдоғанни Туркия Республикаси Президенти лавозимига сайлангани муносабати билан самимий табриклаб, унга катта муваффақиятлар тилади.

“Ўзбекистон-Туркия кўп асрлик дўстлик ва стратегик шериклик муносабатлари бугунги кунда юқори суръатлар билан ривожланаётгани ва мустаҳкамланиб бораётгани чуқур мамнуният билан алоҳида қайд этилди. Давлатлар раҳбарлари, шунингдек, мамлакатларимиз ўртасидаги кенг қамровли ва кўп қиррали ҳамкорлиги, минтақавий ва халқаро аҳамиятга молик долзарб масалалар юзасидан фикр алмашдилар. Мулоқот сўнгида Ўзбекистон Республикаси ва Туркия Республикаси Президентлари барча соҳаларда ўзаро манфаатли ҳамкорликни изчил ривожлантиришга тайёр эканликларини яна бир бор билдирдилар”, - дея қайд этилади хабарда.

Эслатиб ўтамизки, 24 июн куни Туркияда муддатидан олдинги президентлик ва парламент сайловлари ўтказилди. Умумхалқ овоз бериши олдин режалаштирилган санадан бир ярим йил олдин, – Туркияда бўлиб ўтган сайловлар 2019 йилнинг ноябрида ўтказилиши керак эди – бўлиб ўтди. ОАВнинг хабар беришича, Эрдўғаннинг сўзларига кўра, ушбу қарор мамлакатнинг зудлик билан ижро президентлигига ўтиш зарурияти билан боғлиқ.

Президентлик сайловларида олти номзод иштирок этди, уларнинг орасида амалдаги давлат раҳбари Режеп Таййип Эрдоған ҳам бор.

Унга энг кучли рақиб мухолиф сўлмарказчи Республика-халқ партиясидан (Отатурк партияси) президентликка номзод Муҳаррем Инже бўлди. Кўпчилик айнан унинг Эрдоған билан 8 июл куни бўлиб ўтиши керак бўлган иккинчи турга ўтишини башорат қилган эди.

Шунингдек, сайловларда амалдаги президент билан собиқ Ички ишлар вазири Мерал Акшинер, мухолифатга ўтган курд номзод Селаҳаттин Демирташ ва яна икки номзод ҳокимият учун курашди.

Режеп Таййип Эрдоған биринчи турнинг ўзидаёқ президент қилиб қайта сайлангани ҳақида норасмий ҳисоб-китоб натижаларига таянган ҳолда маълум қилди. Уларга кўра у 52% овоз олган.

Сайловлар натижаларидан бири шу бўладики, овоз беришдан кейин турклар бир йилдан кўп вақт аввал – 2017 йил апрелда ўтказилган референдумда ёқлаган конституциявий ўзгаришлар кучга киради. Унга кўра Туркия парламент республикасидан президентлик республикасига айланади. Давлат бошлиғининг ваколатлари эса деярли чексиз бўлади.

Сурат манбаи: http://uznews.uz/ru/article/8949