Ўзбекистонда энг замонавий атом электростанцияси қурилади – “Росатом” раҳбари
Тошкент 10 октябр. ЎзТАГ – Ўзбекистонда энг замонавий атом электростанцияси қурилади, деди “Росатом” - Халқаро тармоқ” раҳбари Александр Мертен, деб хабар беради Ўзбек телеграф агентлиги (ЎзТАГ).
“Ўзбекистонда Халқаро атом энергияси агентлигининг (МАГАТЭ) барча хавфсизлик стандартларига жавоб берадиган энг замонавий АЭС барпо этилади. Энергия блокининг кафолатланган ишлаши 60 йилга мўлжалланган бўлиб, 20 йилга узайтирилиши мумкин, станциянинг қуввати мамлакатда ишлаб чиқарилаётган умумий электр энергиясининг бешдан бирига тенг бўлади”, - деб келтиради ТАСС А. Мертеннинг МАГАТЭ миссияси ва “Росатом” ишчи гуруҳининг биргаликдаги семинардаги сўзларини.
У бу ҳақда Ўзбекистондаги биринчи атом станциясининг қурилишига бағишланиб, “Росатом” давлат корпорацияси томонидан “Ўзатом” атом энергетикасини ривожлантириш агентлиги кўмагида ташкил этилган семинарда баён қилди.
А. Мертен ОАВга берган интервьюсида айтишича, Россия технологиялари асосида қурилаётган атом станцияси 8-10 йил давомида қурилади. АЭСни Навоий вилоятида қуриш режалаштирилмоқда. Лойиҳанинг бошланиши 19 октябр куни Россия Федерацияси президенти В. Путиннинг Ўзбекистонга расмий ташрифи чоғида бўлиб ўтиши кутилмоқда.
Эслатиб ўтамиз, Россия ва Ўзбекистон ўртасидаги атом электростанцияларини қуриш бўйича ҳамкорлик тўғрисидаги ҳукуматлараро битим 2018 йил 7 сентябр куни Москвада имзоланган. АЭСни қуриш учун Ўзбекистон Россияда ҳам, хорижда ҳам муваффақиятли фаолият юритаётган ВВЭР-1200 русумидаги “3+” авлодли реакторни танлади. У МАГАТEнинг барча хавфсизлик стандартларига ва талабларига жавоб беради.
Сурат манбаи: из http://stv.uz
