Ўзбекистонда конверсион карталардан нақд пул ечиб олишда чекловлар бекор қилинди

Тошкент. 6 декабр. ЎзТАГ – Ўзбекистонда конверсион карталардан валютада нақд пул ечиб олишда чекловлар бекор қилинди, деб хабар беради Ўзбек телеграф агентлиги (ЎзТАГ).

Бу Марказий банкнинг “Чет эл валютаси олди-сотдиси бўйича банк хизматлари оммабоплигини таъминлаш бўйича кўрилаётган чора-тадбирлар тўғрисида”ги қарори билан кўзда тутилган. Ҳужжат МБ сайтида жойлаштирилган.

“Банкоматлар орқали чекланмаган миқдорда нақд чет эл валютасини ечиш имконияти яратилиб, барча мавжуд кунлик ва ойлик чекловлар бекор қилинди. Конверсион карталардан фойдаланишда мамлакат ва турли хил мақсадлар бўйича ўрнатилган чекловлар бекор қилинди. Эндиликда ушбу карталар орқали дунёнинг барча мамлакатларида исталган дўкон, меҳмонхона ва тўлов қабул қилиш имкони мавжуд бўлган нуқталарда тўловларни амалга ошириш мумкин. Конверсион карталардаги маблағлардан Ўзбекистондаги банклар орқали тегишли ҳужжатлар (инвойс) тақдим этган ҳолда даволаниш, ўқиш ва бошқа мақсадлар учун фойдаланиш мумкин”, - дейилади ҳужжатда. 

Шунингдек, чет элга пул ўтказмаси амалга оширилаётганда жисмоний шахсларнинг миллий валютадаги нақд пул маблағларини, шу жумладан, уларнинг банк карталаридаги маблағларини автоматик тарзда конвертация қилиш тартиби жорий қилинди.

Бундан ташқари, ҳужжатда банкларнинг кўрсатилган операциялар учун оладиган комиссион ҳақлари миқдори ҳам кўрсатилган. Хусусан, конверсион карта орқали тўлов учун бу миқдор 0,5-1,0%, юридик шахслар маблағларининг конвертацияси учун асосан 0,2-0,5% ташкил этади.