Ўзбекистонда нотариус қабулига онлайн тарзда ёзилиш мумкин
Тошкент. 6 декабр. ЎзТАГ – Ўзбекистонда нотариус қабулига онлайн тарзда ёзилиш мумкин, деб хабар беради Ўзбек телеграф агентлиги (ЎзТАГ).
Янги хизмат Ягона интерактив давлат хизматлари порталида пайдо бўлди.
Юридик ва жисмоний шахсларга улар учун қулай бўлган ва аниқ белгиланган вақтга ёзилиш имконияти очилди. Хизматдан фойдаланиш учун махсус формани тўлдириш, унда хизмат тури, санаси, аниқ вақти, нотариал идора ва бошқа маълумотларни киритиш лозим.
Нотариал идора ходимлари буюртмани олганидан кейин уни “Нотариал ҳаракатларни амалга ошириш ҳақидаги мурожаатларни навбатма-навбат қайд этиш дафтари”да рўйхатга олишлари керак бўлади.
Ушбу меъёр Адлия вазирлиги томонидан 2014 йил 30 декабрда тасдиқланган “Давлат нотариал идораларида жисмоний ва юридик шахсларнинг мурожаатларини навбатма-навбат қайд этиш тартиби тўғрисидаги низом” билан кўзда тутилган.
Низомга мувофиқ, мурожаат қилувчи нотариус томонидан мурожаат келиб тушган кундан кейинги кундан кечиктирмай қабул қилиниши зарур.
Мурожаат қилувчи белгиланган вақтда нотариус қабулига келмаган ҳолда у умумий асосларда қабул қилинади ёки қабул қилиш вақти қайтадан тайинланади. Белгиланган вақтдан бошқа шахс фойдасига воз кечиш мумкин эмас.
