Ўзбекистонда ОАВни рўйхатга олиш бўйича аризаларни кўриб чиқиш тартибини соддалаштириш режалаштирилмоқда

Тошкент. 11 декабр. ЎзТАГ – Ўзбекистонда ОАВни ва интернет глобал тармоғида веб-сайтларни рўйхатга олиш бўйича аризаларни кўриб чиқиш тартибини соддалаштириш режалаштирилмоқда, деб хабар беради Ўзбек телеграф агентлиги (ЎзТАГ).

Хусусан, Ўзбекистон Республикаси Олий Мажлиси Қонунчилик палатасининг (парламент) ОАВ тўғрисидаги қонунларга ўзгартиш ва қўшимчалар киритиш ҳақидаги қонун лойиҳаларини биринчи ўқишда кўриб чиқишга бағишланган йиғилишида шу тўғрида сўз кетди.

Ўзгартиш ва қўшимчалар “Оммавий ахборот воситалари тўғрисида”ги Ўзбекистон Республикаси Қонунига кирилаётган бўлиб, бу оммавий ахборот воситаларининг фаолияти эркинлигини, ахборотлардан эркин фойдалана олишини, уларни давлат органларининг ғайриҳуқуқий қарорларидан, мансабдор шахсларнинг ҳаракатлари ёки ҳаракатсизлигидан ҳимоя қилишни таъминловчи ҳуқуқий, иқтисодий ва ташкилий шарт-шароитларни яратишни кучайтириши зарур.

Журналистлар ва ижодий жамоаларни уларга солиқлар ва бошқа мажбурий тўловлар бўйича имтиёзлар ва преференциялар тақдим этиш, молиявий ва ижтимоий ёрдам кўрсатиш йўли билан давлат томонидан қўллаб қувватлашнинг ҳуқуқий механизмлари белгиланмоқда.

Шунингдек, “Журналистлик фаолиятини ҳимоя қилиш тўғрисида”ги Ўзбекистон Республикаси Қонунига ўзгартиш ва қўшимчалар киритиш ҳам режалаштирилмоқда.

Депутатларнинг таъкидлашича, қонун лойиҳаси давлат органлари фаолиятининг очиқлигини таъминлашда ҳамда жамоат манфаатларига молик долзарб масалаларни ёритишда журналистларнинг нуфузини ошириш мақсадини кўзлайди.

Масс-медиа вакилларига журналистлик фаолиятини амалга оширишда қўшимча ҳуқуқлар берилади.

Ҳужжатларнинг тўлиқ матни билан regulation.gov.uz порталида танишиш мумкин.

Сурат манбаи: https://forbes.kz/news/