Ўзбекистонда суюлтирилган газ учун композит баллонлар ишлаб чиқариш йўлга қўйилди
Тошкент. 7 сентябр. ЎзТАГ – Ўзбекистон мустақиллигининг 27 йиллиги арафасида суюлтирилган газ учун мўлжалланган композит баллонларни ишлаб чиқариш бўйича янги “UNG ECCONN” МЧЖ ҚК ишга туширилди, деб хабар беради Ўзбек телеграф агентлиги (ЎзТАГ).
Янги корхонанинг таъсисчилари тенг улушларда “Ўзбекнефтгаз” АЖ таркибига кирувчи “Нефтгазинвест” масъулияти чекланган жамияти ва “Hyundai International Co.Ltd.” (Корея Республика) компанияси бўлди.
“Ўзбекнефтгаз” АЖ матбуот хизмати хабарига кўра, лойиҳа қиймати жами $5,3 млнни ташкил этиб, шу жумладан, унинг $2,2 млнни қурилиш ва монтаж ишларига, $3,05 млни ускуна ва жиҳозларга сарфланди.
Биринчи босқичда йилига 60 минг дона “ECONN 20” композит баллонларини ишлаб чиқариш режалаштирилган. Иккинчи босқичда эса ушбу кўрсаткич икки баробарга ортиши керак.
Қўшма корхона Тошкент вилоятидаги “Ангрен” ЭИЗ ҳудудида жойлашган бўлиб, уч гектар майдонни эгаллаган. Ишлаб чиқаришни маҳаллийлаштириш даражаси 77%, лойиҳанинг ўзини оқлаш муддати 2 йилни ташкил этади.
Таҳлилчиларнинг тасдиқлашларича, МДҲ бозорининг ушбу маҳсулотга эҳтиёжи 30 млн. донани ташкил этади. Айни пайтда ҳозирда фойдаланилаётган баллонларнинг 60% эскирган.
“ECONN 20” композит баллонлари – интеграция қилинган ҳимоя тизимлари ҳисобига янги хавфсизлик даражасига эга замонавий юқоритехнологик маҳсулотдир. Улар “инсон омили муаммоси”ни минималлаштириш учун ушбу маҳсулотнинг муаммоли зоналарини ҳисобга олган ҳолда ишлаб чиқилган.
“UNG ECONN” МЧЖ ҚКда ҳажми 50 литрлик (20 кг.) баллонлар ишлаб чиқарилмоқда, ҳароратнинг иш интервали – Цельсий бўйича минус 40 градусдан плюс 80 градусгача. Хизмат қилиш муддати – камида 10 йил.
Сурат манбаи: муаллиф юборган расм
