Ўзбекистонда ТИА эксперт баҳолаш бўйича агентлик тугатилмоқда
Тошкент. 22 март. ЎзТАГ – Ўзбекистонда Вазирлар Маҳкамаси ҳузуридаги Янгидан қурилаётган ва реконструкция қилинаётган ишлаб чиқариш қувватлари лойиҳаларининг техник-иқтисодий асосланишини, техника ва технологияларни эксперт баҳолаш агентлигини тугатилмоқда, деб хабар беради Ўзбек телеграф агентлиги (ЎзТАГ).
Президент матбуот хизмати маълумотларига кўра, энди унинг ваколатлари бошқа ташкилотларга ўтказилади.
Хусусан, “Ўзбекэкспертиза” АЖга импорт шартномалари инвестиция лойиҳаларини, хусусан, тайёр ҳолда топшириладиган лойиҳаларни амалга ошириш доирасида сотиб олинадиган ускуналар, техника ва технологияларнинг нарх кўрсаткичлари бўйича экспертизадан ўтказиш вазифаси топширилди.
Инвестиция лойиҳалари ташаббускорлари бўлган тармоқ вазирликлари қошида ташкил қилинаётган Кенгашларга эса тендер ва лойиҳадан олдинги ҳужжатларни, таклиф қилинаётган ускуна ва технологияларнинг нархларига доир хужжатларни экспертизадан ўтказиш вазифаси юклатилди.
Ҳукуматга “Ўзбекэкспертиза” АЖ фаолиятини такомиллаштириш бўйича чора-тадбирларни ишлаб чиқиш, унинг фаолиятига экспорт-импорт операцияларини маркетинг жиҳатидан таҳлил қилиш соҳасидаги тажрибали ва малакали мутахассисларни жалб этиш вазифаси топширилди.
