Ўзбекистонда Жаҳон савдо ташкилотига киришнинг қишлоқ хўжалиги жиҳатлари муҳокама қилинмоқда

Тошкент. 25 июн. ЎзТАГ – 21-22 июнда Тошкентда “ЖСТга киришнинг қишлоқ хўжалиги жиҳатлари: қишлоқ хўжалиги ва савдо сиёсати учун оқибатлар” семинари бўлиб ўтди, деб хабар беради Ўзбек телеграф агентлиги (ЎзТАГ).

У Ўзбекистон Ташқи савдо вазирлиги томонидан Жаҳон банки гуруҳи, Бирлашган Миллатлар Ташкилотининг Озиқ-овқат ва қишлоқ хўжалиги ташкилоти билан ҳамкорликда ташкил этилди.

Семинар ишида Италия, Россия, Украина, Қозоғистондан қишлоқ хўжалигини қўллаб-қувватлаш бўйича экспертлар, шунингдек, Ўзбекистон вазирлик ва идораларининг 50 дан ортиқ вакиллари иштирок этдилар.

ТСВдан хабар қилишларича, иштирокчилар минтақадаги давлатларнинг Жаҳон савдо ташкилотига (ЖСТ) кириш тажрибаси ва қишлоқ хўжалиги соҳасидаги мажбуриятларини амалга оширишнинг боришини, шунингдек, ЖСТга интеграция жараёнида қишлоқ хўжалигини субъектлари дуч келиши мумкин бўлган муаммоларни муҳокама қилдилар.

Шунингдек, иштирокчилар семинар давомида ЖСТ қишлоқ хўжалиги бўйича келишувларининг асосий қоидалари, санитария ва фитосанитария чораларини қўллаш, қишлоқ хўжалигининг ЖСТ меъёрларига мослашуви масалалари билан танишдилар.

Сурат манбаи: http://knews.kg/2018/03/14/ministr-protsess-prisoedineniya-uzbekistana-k-vto-mozhet-zanyat-gody/