Ўзбекистонлик қизлар жамоаси илк марта Technovation Challenge финалига чиқди

Тошкент. 22 июн. ЎзТАГ – Ўзбекистонлик қизлар жамоаси илк марта Technovation Challenge 2018 халқаро конкурсининг финалига чиқди, деб хабар беради Ўзбек телеграф агентлиги (ЎзТАГ).

Ахборот технологияларини ривожлантириш вазирлигидан хабар беришларича, 20 июнда жаҳон миқёсида иштирок этиш ҳуқуқини қўлган киритган 12 финалчи жамоалар номи аниқ бўлди. Финалчи жамоалар ёш тоифасига кўра тақсимланган: катта ёшли (15-18 ёш) иштирокчилар 6 жамоа ҳамда кичик ёшли (10-15 ёш) иштирокчилар 6 та жамоа.

Generation Z деб ном олган Ўзбекистон жамоаси финал босқичининг кичик ёшли жамоалари ўртасида ғолиблик учун курашади. Уларнинг иловаси ELIST деб номланган. Унинг мавзуси оилада гендер тенглигини таъминлаш мавзусига бағишланган бўлиб, оилада вазифаларнинг ўғил-қизлар ўртасида ўзаро тенг тақсимланишига хизмат қилади.

Энди жамоа ўз лойиҳасини халқаро ҳакамлар қаршисида ҳимоя қилиш учун тақдим қилиш учун Калифорнияга йўл олади. Танловнинг финал босқичи 2018 йилнинг 6-10 август кунлари бўлиб ўтади. Жамоалар 2 та биринчи ўрин учун баҳсга киришадилар (ҳар бир ёш тоифаси бўйича бир нафар ғолиб эълон қилинади).

Эслатиб ўтамиз, 2018 йилда ташкил этилган Technovation Uzbekistan танловида юртимизда 29 та жамоа иштирок этган. Жамоалар мураббий ва раҳбарлар кўмагида Ўзбекистон учун долзарб ҳисобланган ва ижтимоий аҳамиятга эга лойиҳани ишлаб чиқдилар. Мазкур жараён мобайнида қатнашчилар учун хорижий ва маҳаллий эксперт иштирокида таълимий семинар ҳамда маҳорат дарслари ташкил қилинди.

Technovation лойиҳасининг мақсади – 10-18 ёшли ўқувчи қизлар ўртасида танқидий фикрлаш, тадбиркорлик ҳамда дастурлаш кўникмаларини шакллантиришдан иборат. Мазкур лойиҳа хотин-қизларнинг ахборот технологиялари соҳасига қизиқишларини оширади, соҳага хотин-қизларни жалб қилишда муҳим ўрин эгаллайди.

Сурат манбаи: https://uznet.press/m/353973.html