ЎзРТХБнинг “Электрон каталоги” биринчи йил иш якунларини сарҳисоб қилди
Тошкент. 30 июн. ЎзТАГ – Ўзбекистон Республика хом-ашё биржасининг (ЎзРТХБ) “Электрон каталоги” биринчи йил иш якунларини сарҳисоб қилди, деб хабар беради Ўзбек телеграф агентлиги (ЎзТАГ). Яқинда ўтказилган матбуот анжумани ушбу мавзуга бағишланди.
“Электрон каталог” тизимида бир шартнома бўйича $100 минг эквиваленти қийматигача бўлган зарур товарларнинг хариди амалга оширилади ва уларнинг рўйхати давлат харидлари бўйича ҳукумат комиссияси томонидан тасдиқланади.
Электрон савдолар жараёни фақат 48 соат вақт олади, савдо ғолиби эса электрон тизим томонидан нархлар сўрови механизмини қўллаш орқали автоматик тарзда аниқланади. Электрон савдолар билан боғлиқ бўлган барча операциялар фойдаланувчининг шахсий кабинетида бажарилади.
2015 йилнинг 1 июнидан то жорий йилнинг 1 июнигача бўлган давр мобайнида электрон каталогда 70,1 млрд сўмлик 65 мингта битим тузилган бўлиб, 20,3 млрд сўмлик бюджет маблағлари тежалди. Тузилган битимларда тадбиркорлик субъектларининг 100%лик иштироки таъминланди.
